XIX FESTIVAL INTERNACIONAL DE TÍTERES DE REDONDELA

(Memorial Juanjo Amoedo do 14 ao 20 de maio do 2018)

O XIX FESTIVAL INTERNACIONAL DE TÍTERES DE REDONDELA
CONGREGARÁ 26 COMPAÑÍAS DO 14 AO 20 DE MAIO

• A nova edición do Festival arrancará o luns 14 de maio coa programación
escolar, na que xa hai confirmados máis de 2.400 cativos
• Ademais do mellor teatro de monicreques, a programación ábrese a outras
disciplinas como a música, o concerto de María Fumaça, circo de rúa e a ruada
participativa “10.000 leguas de viaxe pola vila”

Redondela, 04/05/2018. A XIX edición do Festival Internacional de Títeres de Redondela
arrancará o luns 14 de maio coa campaña escolar no Auditorio de Chapela, que ata o
venres acollerá máis de 2.400 cativos nas oito funcións programadas a cargo de
Tanxarina, Viravolta Títeres, Don Davel e Periferia Teatro.
A partir do mércores, o Multiusos da Xunqueira acollerá a programación de sala, con
propostas chegadas de Francia, Reino Unido, Chile, Murcia, Andalucía, Cataluña e
Galicia, a cargo de Don Davel con ‘Le Fumiste’; Stephen Mottram con ‘The Parachute’,
David Zuazola con ‘El juego del tiempo’, Periferia Teatro con ‘Vuela Pluma’; Compañía
Jordi Bertrán con ‘Poemes Visuals’, Baobab Teatro con ‘Pum! Pum!’ E Títeres Etcétera
con ‘El Alma del Pueblo’.
Malia que todos os espectáculos de rúa son de balde, as funcións de sala teñen un prezo
de 6€ adulto e 4€ nenos. A venda farase unicamente na billeteira física do Multiusos, sen
posibilidade de compra online. Abrirá o día 16 ás 19:00h e poderanse mercar entradas
para calquera función, sempre e cando non superen o 50% do aforo, que se reserva para
vender no mesmo día. O horario de apertura será de dúas horas antes de cada sesión
agás para as funcións das 17:00h, que abrirá unha hora antes.
Monicreques, circo de rúa e música nas rúas
Como xa é habitual, o 17 de maio e a fin de semana, os monicreques sairán do teatro
para exhibirse nas prazas e rúas de Redondela. Nesta edición, ademais, o programa
acollerá outras disciplinas artísticas, co concerto de María Fumaça o Día das Letras
Galegas, o novo circo, a cargo da compañía Teatro ao Cubo e os espectáculos
itinerantes.
O domingo 20, os protagonistas da ruada participativa “10.000 leguas de viaxe pola vila”
serán os cativos da vila, que acompañarán a un grande submarino -dos portugueses
Projeto EZ- disfrazados de choco ou de calquera outro animal mariño dende o peirao de
Cesantes ata o centro de Redondela.

Ademais, quen queira levar para a casa un monicreque artesanal, terá a oportunidade de
visitar o Mercadiño Titiriteiro, instalado nos Xardíns da Alameda, que en tan só 15
minutos cubriu todas as prazas.
Carteis e programas, a partir do luns
A cartelería e os programas de man poderanse conseguir a partir do luns no Multiusos da
Xunqueira -a partir do martes en Chapela-, e durante a semana do Festival, tamén se
poderán recoller nos mesmos lugares un mapa informativo cos distintos espazos e
escenarios, espallados por toda a vila.
As camisolas, crachas e demais merchandising titiriteiro porase á venda no stand do
Festival na Festa do Choco, e durante a mesma semana en distintos puntos de
Redondela.
Convenio
A dez días do Festival, con todos os preparativos pechados e a programación na rúa, a
Asociación Xente Titiriteira segue á espera de asinar o convenio co Concello de
Redondela.